<挑> 早起訓練

挑戰自己

話說，我係一個鐘意訓覺到可以連續訓十幾個鐘唔洗起身去洗手間同食野既人！但係前排，網絡上見到話早起既好處之後，我就覺得可能挑戰一下自己。

但係無啦啦好難會令自己早起身，所以我就用左早餐挑戰黎令自己早起身，當然，最初都唔係咁成功，會好多藉口等等，但慢慢我又開始喺ig上載我既早餐相，但其實呢個先係令我可以堅持早起既原因，因為當日日都會有一張早餐相上載，中間如果斷開左，強迫證人士真係會好難頂，所以慢慢，咁就堅持左三個月有多～雖然早餐並唔係啲好勁好正好吸引果啲，但係我已經挑戰成功，而且到依家已經唔需要迫自己早起post相。

＜早起不難，難在心態＞

其實早起唔難，例如返工，點解下下都要等到最後一分鐘先起身，係因為如果早左起身冇野做，所以往往我地都會選擇唔好蝕，訓到最後一秒先起身，但如果我地訂立一個目標，例如早起睇書、食早餐等等，總之你諗到想做咩就做咩，但要堅持，咁慢慢就會習慣。

而且早起身原來真係有意想不到既收獲。

成功人士早起身會做運動、覆電郵等等，而我只係食早餐、學英文、睇書等等，而我亦都發現，比預定出門口時間早起身運作下自己既身體或者腦筋，返到工作場所時，人係會精神啲，而且平時會覺得好攰既感覺都會冇左，而且每晚都可以維持早左訓，其實咁樣好好。

所以大家不妨比個藉口自己，練習早起。