<夢>有一間店,叫咖啡王子一號店

有一間店，叫「咖啡王子一號店」。

我已經唔記得第一次接觸到咖啡王子一號店係幾時，同邊度，只知道，一睇就愛上。

睇維基，應該係2007年喺韓國播放，而我既印象係，我係大陸買左套DVD返黎睇。九年。我諗我對咖啡既迷戀就點止九年咁少。

夢想。點樣可以捉住？

開咖啡店係我細細個既一個願望，20歲既時候訂立一個十年計劃，希望30歲之前，可以擁有自己既一間cafe。30歲就已經過左去，cafe就未開得成，但夢想依然喺度。

好多人都會問，點解十年都仲未可以達成夢想？其實好多時候我都唔識點答，可能太多事想做，可能唔夠專一，可能，太多可能而導致失敗。

呢十年，究竟做過啲咩，學左甜品，做過cafe，去左working hoilday，其實話多唔多話少唔少，夢想係終點定過程？

前陣子有個auntie問我關於夢想既事，其實我都多謝果個auntie問我有關夢想既話題，因為係佢先令我反思行左十年既夢係咩，當大部分人在乎個結果同之後既延續既同時，原來我在乎既係過程，正正令我覺得呢十年其實冇白過，點樣去學習成長，鋪排點樣啟動夢想，雖然到依家依然係「一事無成」，但我內心滿足～

2016年，我終於可以去到韓國首爾，可以去到搵真正既咖啡王子一號店，但可惜去到之後發現原來已經結業，雖然好失望，但因為咖啡王子一號店，而令我繼續發夢。