<活>生涯規劃

最近有好多＜生涯規劃＞既說法，但我唔想講關於政治啦，我想講講自己，年過三十，又一次陷入迷思中，究竟我既人生應該要點？呢個問題係一直都困擾住我既問題，係要讀書，開店定係點呢？又改變唔到現狀，又唔想接受將來繼續係咁，就塞左喺呢個位度好耐，久不久又飛一轉逃避，好想喺生日之前劃定一個地圖，去令自己心安。

<活>習慣

我沒有生活小撇步，就只有累積下來的小經驗。

從中一到半年前既我，訓覺對我黎講，真係十分重要，亦都係唔到最後一刻都唔起身果種。

直至半年前左右，因為成日都睇到好多唔同既文章都講早起既好，令我都覺得成日訓到最後一刻真係浪費時間，所以我都想挑戰一下自己！

最初其實真係冇咩令自己可以早起，所以我就用左食早餐兼放上網呢個挑戰令自己可以維持住早起，其實以前我根本就唔食早餐，食左早餐反而令自己唔舒服，但自從早起食早餐之後，到左今時今日，唔食早餐就會開始手震，哈哈！係真架！我既早餐唔會勁豐富，因為始終由唔食早餐到迫自己起身所以整早餐，所以其實果幾個月黎黎去去影黎影去都係果啲早餐，所以既然我已經成功早起，我就冇再維持要Post相既習慣啦！

除左食早餐之外，我仲會練習英文，其實一直都仲係好想考IELTS，所以另一件事就係溫英文啦，但到依家我都仲未有勇氣去考，睇黎要再努力啲啦～

從聽日開始，不如試下早起先！每日早起一點，慢慢就會習慣架啦～而且早起啲時間真係好用好多，人都精神啲！係真架～你都試下啦！

30日早起挑戰

<活> 生活

人生有時真係好悶，有時又會唔知為咩，小朋友就係讀書返學過日子，離開校園後既生活就係返工搵錢令自己過好生活，但走著走著，人生去到某一個階段時，就會有啲迷失，又有時可能每幾年有一次既迷失，可能習慣左一種生活，需要返一啲新衝擊。

記得以前澳洲工作假期既時候，成日都會話：「計劃趕不上變化。」其實係真既，有時候，有計劃，但要轉變時，反而令腦筋更靈活，唔洗下下都習慣左一個方向。工作假期就只有一至兩年，就算去曬咁多個地方，都係十年內既事，十年後，又係要面對一個單一既生活，所以生活係需要挑戰自己，諗啲點子令生活唔好苦悶。我成日都每隔一段時間就會反思自己既人生、生活，當然，每次反思，都好似冇咩成果，但每反思一次就會瞭解自己多一啲，所以就算有冇成果都好，都需要每自己有一個思想放空既空間。

最近，真係有啲塞，腦塞。所以，睇一睇呢本書，值得推介架！梗有一篇會中你心中所想，或者不妨跟佢既指示做，可能有啲新發現。

共勉之。

一個人的美好日常小關卡：讓自己每天充滿幹勁的108個秘密
作者： 上大岡留

譯者：楊裴文
出版社：晨星

<時>不吐不快

睇到呢啲新聞真係好痛心，一個清潔工倒水被票控？咩事？其實我係咪唔應該再問香港點解會變成咁，真係好唔明白，法律不外乎人情，好多時候都可以注意下身邊既事再落決定，又係咪真係欺善怕惡？究竟佢地係因咩事而要咁樣做？已經冇左人情味呢三個字？係咪為左交數呢？

身邊每分每秒都發生緊類似既事件，但請你停一停諗一諗事情係咪得一個解決方法。

＜我覺得香港愈來愈陸化了＞

以前睇新聞只會見到大陸既外交出黎話希望其他國家不要干預中國既內政；
今時今日到議員宣誓事件就又有人出黎話唔希望其他國家干預我地。

究竟咩事呀？

我唔敢講以前既香港唔會有今日既清潔工事件，不過亦都由於科技既發達而令事件更透明化。多謝科技，令我地要為做過每一件事負責任！


【清潔工倒水被票控】

鄺俊宇去信食環署促酌情豁免罰款　莊偉忠：我睇唔起呢啲鐵石心腸嘅「人」

<時>埋沒良心的

特區政府回應表示，一國兩制得到成功落實，是國際社會有目共睹，外國政府不應以任何形式干預香港的內部事務。


英國報告指香港權利自由受壓
http://news.now.com/home/local/player?newsId=196535&refer=share

由雨傘運動之後，所有野都愈來愈荒謬。

我唔識去數，但每件事都令我覺得好可笑，每日睇住新聞，由選擇性到強制性，如果冇得選擇果批，就強迫性洗腦地覺得有一班人攪亂香港，有得選擇果班就可以全面一啲知道發生咩事。

其實點解個社會變成咁？其實我想逃避，唔想面對依家、甚至係將來既香港，根本已經令人冇信心，有人話，就正正因為咁所以要留低，但，我真係覺得好無力，亦冇能力去改變。

可能咁樣會令人覺得好自私，但我真係支持一班做實事既人，我都好想香港可以變返以前咁。加油呀！

<日>殺不到的四腳蛇x耿耿於懷 + 終結篇

喺屋企又見到四腳蛇行蹤 -.-

話說，打算沖涼，札好頭髮就入洗手間，喺閂門果時，眼尾見到個影，係黃黃地色既影～第一個反應仲以為自己啲頭髮咁鬼飄逸！但覺得唔多對路，閂門再開門，來回左兩三次～終於比我見到你！「可惡的四腳蛇」。

又話說，對於捉四腳蛇已經充滿經驗既我們這一家，已經手到拿來，非常純熟，所以只要同心協力，殺死佢地一啲都唔難。

但由於當晚就只要我同已經熟睡既爸爸喺屋企，所以我手滕腳震地準備隊霖佢！但我亦都清楚明白單憑一個人係好難將佢ＫＯ！但都唔緊要，所以我準備好熱水，控制好自己情緒就將熱水淋去目標。點知，最後，都係失蹤左。仲攪左好鬼耐同好鬼驚咁去沖涼。

但皇天不負有心人，喺一個星期後，又係媽媽唔係屋企既日子，出完街返屋企，喺一入門口直望既天花板位，竟然比我見到個影（未開燈一睇就覺得係佢）。之後小心冀冀地打算放佢一條生路，因為佢企既位置就喺窗附近，而佢見到我有行動佢都行左幾步，而且佢已經行到窗既位置，所以我打算開返隻窗再撩佢出去，點知，佢唔領情仲要向下走>.<" 激死我。所以我決定邀請埋已經熟睡既爸爸一齊對付佢。

拉開曬佢所在位置附近既傢私，準備好熱水同濕毛巾，但竟然見佢唔到，正想放棄之際，竟然喺窗度發現佢，爸爸二話不說，一野熱水淋落去！即刻喺地下見到佢，點知佢仲典左兩下，濕毛巾就係呢個時候發揮作用，可以利用重力去令佢唔再掙扎。

就係咁，我地又ＫＯ一條。

死啦～四腳蛇。

<夢> 窩心餐廳

夢想，是擁有一間窩心餐廳。

前排為左教媽媽用My TvSuper，所以求其揀左呢套睇，點知睇下睇下我都追埋一份。

呢套真係好好睇，雖然都係有少少離地，不過係講一個女仔咩都冇曬去左濟洲島度想開Cafe，點知又遇返19歲時認識既一個有錢仔而開始既一個故事！

重點，我睇既～當然係間餐廳啦，我都好想喺一個島，一個海邊，開一間自己喜歡既餐廳，唔知呢個夢，幾時會實現呢？